„Ég held að ég væri komin á Ólympíuleikana ef ég hefði verið í svona grunnskóla.“
Á tíu árum hefur margt gerst. NÚ hefur vaxið og tekið breytingum, nemendur hafa komið og farið og ótal minningar orðið til á leiðinni.
Hér lítum við yfir farinn veg og rifjum upp sögu skólans, önn fyrir önn, í máli og myndum – frá fyrstu skrefunum árið 2016 til dagsins í dag.
NÚ er grunnskóli fyrir unglinga sem hafa áhuga á íþróttum. Við sameinum íþróttaáhuga og grunnskólanám svo nemandinn sinni náminu af sama metnaði og íþróttinni.
NÚ vill veita unglingum tækifæri til að samtvinna íþróttaáhuga sinn og grunnskólanám þar sem nemandinn sinnir námi sínu af sama áhuga og íþróttinni. Með nútímatækni og nýjum kennsluaðferðum veitum við nemendum frelsi til að nálgast námið á eigin forsendum. Við viljum skapa umhverfi þar sem nemendur finna til ábyrgðar, áhuga, heilbrigði og umfram allt ánægju.
Nemendur fá tækifæri til að nálgast námsefnið á eigin forsendum og kennarinn aðstoðar hvern og einn nemanda á þeim stað sem hann er staddur.
Flest námsgögn eru aðgengileg í fartölvu sem hver nemandi fær til afnota, engin þung skólataska.
Markviss þjálfun, mistök og endurtekningar skila árangri í íþróttum, sama hugsun nýtist í náminu.
Regluleg hreyfing yfir skóladaginn og áhersla á jákvætt sjálfstal og sjálfstraust nemenda.
Nemendur eru hvattir til að mæta með forráðamanni á umsóknarfund í apríl.
Gísli Rúnar Guðmundsson útskrifaðist með mastersgráðu í verkefnastjórnun árið 2015 og sem íþróttafræðingur frá Kennaraháskóla Íslands árið 2004.
Hefur starfað sem grunnskólakennari frá árinu 1999 og hefur yfir 20 ára reynslu af þjálfun barna og unglinga. Er forvitinn, hefur mikinn áhuga á fólki, ferðalögum og sköpun. Elskar samverustundir með fjölskyldunni og íslenska náttúru.
Sigríður Kristjánsdóttir útskrifaðist sem þroskaþjálfi árið 1979 og lauk viðbótarnámi til BA-gráðu árið 2002. Lauk meistaragráðu í stjórnun menntastofnana árið 2009 og er viðurkenndur markþjálfi frá HR.
Starfaði lengst hjá Svæðisskrifstofu málefna fatlaðra á Reykjanesi, sem forstöðumaður, starfsmannastjóri og framkvæmdastjóri stofnunarinnar til 10 ára. Mikil áhugakona um íþróttir og lýðheilsu almennt og stundar útihlaup sér til heilsubótar.
Kristján Ómar hefur titlað sjálfan sig sem gleðileitara, forvitring, skólasmið og þjálfara. Hann eyddi sjálfur óhóflega mörgum árum í skóla og, kannski þess vegna, fékk eitt sinn þá flugu í hausinn að stofna íþróttagrunnskóla sem loks hóf starfsemi sína árið 2016 undir nafninu NÚ.
Grunnskóli fyrir 8.-10. bekkinga sem leggur áherslu á íþróttir, hreyfingu, heilsu og vendinám. NÚ er viðurkenndur af Menntamálastofnun, starfar samkvæmt Aðalnámskrá grunnskóla og lýtur lögum og reglugerðum um íslenska grunnskóla.
Nemendur frá Hafnarfirði og Garðabæ greiða ekki námsgjöld í NÚ. Námsgjöldin skólaárið 2025-26 verða 29.900 kr. á mánuði í 10 mánuði fyrir nemendur úr öðrum sveitarfélögum á höfuðborgarsvæðinu. Sveitarfélög utan þess gætu haft ólíkan hátt á greiðslum til sjálfstætt starfandi skóla vegna nemenda sinna og gæti það haft áhrif á greiðsluþátttöku viðkomandi nemenda. Vinsamlegast kynntu þér fyrirkomulagið í þínu sveitarfélagi.
Við hvetjum alla á aldrinum 12-15 ára sem hafa einlægan áhuga á íþróttum og heilsusamlegum lífstíl til að sækja um hjá NÚ. Grunnreglan er sú að “fyrstur kemur – fyrstur fær” en við áskiljum okkur rétt til þess að taka mið af búsetu, aldri, kyni og brautarvali nemenda. Umsækjendur eru boðaðir ásamt foreldri eða forráðamanni í viðtal. NÚ er lítill og fjölskyldulegur skóli með aðeins 100 nemendur og því eru að jafnaði aðeins teknir inn um 28-30 nýnemar í 8. bekk ár hvert, ásamt einstaka nemendum í 9. eða 10. bekk.
NÚ hefur sitt aðal aðsetur við Reykjavíkurveg 50 í Hafnarfirði. Íþróttir eru kenndar í Kaplakrika og Bjarkarhúsinu (bæði í stuttu göngufæri frá NÚ). Sund fer fram í Suðurbæjarlauginni. List- og verkgreinar eru kenndar bæði í NÚ og í húsi Tækniskólans, hinu megin við götuna, og heimilsfræði í glæsilegri aðstöðu Flensborgarskóla.
Rauði þráðurinn í öllu námi í NÚ er sjálfstæði og ábyrgð nemandans, þar sem nemandinn lærir að skipuleggja eigið nám og vinnu. Í NÚ er stundað mikið af vendinámi, þar sem innlögn kennara er fyrirfram aðgengileg á netinu svo hver og einn nemandi geti farið áfram á sínum hraða. Hver nemandi fær fartölvu til fullra afnota á meðan hann stundar nám hjá okkur. Í NÚ er kennt í lotum þar sem 3 námsfög eru tekin fyrir og hverri 3 vikna lotu lýkur með námsmati. Mikil áhersla lögð á að halda nemendum líkamlega virkum gegnum skóladaginn og kyrrseta takmörkuð með ýmsum leiðum. Nemendur NÚ setja sér dagleg markmið um þá vinnu sem ljúka skal á hverjum degi og gera markmiðin upp í lok hvers dags. Viltu vita meira um vendinám? Smelltu þá hér
Allir nemendur NÚ fara í gegnum bóklegt námsefni sem hjálpar þeim að ná árangri sem íþróttamönnum. Mikið tillit er tekið til íþrótta- og keppnisiðkunar þeirra.
